Štyri lět do wozjewjenja za tehdyše młodoserbske hibanje wuznamnych Haupt/Smolerjowych ›Pěsničkow‹1 – wosebje tež hladajo na žadany nowy, analogiski prawopis, z kotrymž zmóžnichu susodnym Słowjanam přistup k serbskemu pismowstwu – wozjewi dźewjatnaće lětny Jan Pětr Jordan wobšěrny přinošk wo Łužiskich Serbach w Praskim němskorěčnym časopisu ›Ost und West‹. Z tym je wón prěni »młodoserb« generacije narodneho wozrodźenja, kotryž publikowaše dlěše pojednanje wo swojim narodźe w němskich medijach.
Młody publicist bě drje jara sebjewědomy a energiski. Pochadźeše z Čěškec, prěnjeje wot poddanstwa swobodneje serbskeje wsy, kotruž wotkupichu wjesnjenjo lěta 1559 swojemu knježkej. Narodźi so tam 1818 do konfesionalnje měšaneje swójby – nan Mikławš bě ewangelski a z Baćonja pochadźaca mać Marja rodź. Šołćic bě katolska. Po wopyće wjesneje šule w Čornecach wopyta wón wot junija 1830 Budyski gymnazij, hdźež wuknješe lěto w samsnej rjadowni z Janom Arnoštom Smolerjom. Nazymu 1831 poda so do Prahi, zo by so na gymnaziju za pozdźiši studij bohosłowstwa přihotował. 1836 zapisa so na tamnišej uniwersiće za naspomnjeny studij. Spušćiwši lěće pozdźišo wotpohlad, skónči swój pobyt tam.
