Suchergebnis für: b316e7cc c5f4 44be aa17 e4e5890632e5

Rozmołwa z Thomasom Gerlachom wo jeho skutkowanju a swójbnych stawiznach hač k prapradźědej Janej Bohuwěrej Mučinkej

We Wikipediji wo Was mjez druhim čitaš, zo sće »krajměrjerski inženjer« a »čestnohamtski hladar pomnikow«. Prošu předstajće so a prajće nam něšto słowčkow wo swojim skutkowanju jako­ krajměrjerski inženjer.

Sym so w Drježdźanach-Hellerauwje narodźił a tam wotrostł. ›Heller‹ je šěroka, z holu pokryta terasa nad městom. Po njej bu dźěl města pomjenowany. Tutón krasny kućik njeběše jenož idealne hrajkanišćo za dźěćinu a młodźinu, ale ze starodawna teren wojerstwa. Za mój čas tam sowjetske tanki zwučowachu – z wotpowědnej haru; wosebje pak su wulke płoniny rozjězdźowali. Přez to so na powjerchu zjewichu pokłady: powostanki z rownišćow bronzoweje doby, kotrež smy my młodostni namakali a wotedali a přez to z tehdyšim Krajnym muzejom za pra- a zažne stawizny zwisk dóstali. Tak so we mni hižo zahe přeće zrodźi, zo budu wurywanski technikar. Po studiju sym jako archeologa a stajnje tež jako krajměrjer dźěłał, woboje dlěje hač 40 lět.

Z Łužicu sće na wjacore wašnje zwjazany. Jako čestnohamtski hladar pomnikow w zemi sće wjele lět we Łužicy dźěłał, wospjet w Budyšinje – mjez druhim na hrodźe (1987), w Mnišej cyrkwi (1992) a lěto poz­dźišo na Třělnišću. Kotre wurywanki běchu wosebite, kiž bychu snano tež našich šulerjow a młodźinu zaji­mowali?

Rady. Nimo přepytowanjow w Budyskim starym měsće su kedźbyhódne: nuzowe wuchowanje bronzowych časowych popjelnicowych rowow kaž tež srjedźo- a pózdnjosłowjanskich hórkow a ćělnych rowow na kromje pěskoweje jamy Dobranec a wulkopłoninowe přepytowanja znutřka bronzoweho sydlišća na Wowčej horje pola Lubija.