»Gromaźe njejsy sam« jo moto Witaj-festiwala kóńc julija w Miłoćicach, kótaryž sam sobu organizěrujom. Moto stoj za mnjo prototypiski za wuznam a wuwiśe subkulturnych serbskich festiwalow ako Meta Solis, SubSorb a Witaj-festiwal. Stoj za žywjeńske wjasele, zgromadnosć, zwězane seśi a praksisowe zgromadnosći.
Wuznaśe a familiarna slězyna wšak móžotej jědro togo serbskego byś, ale mimo zajma, mimo zagóritosći zgubijotej swój wóznam. Teke swójska identita musy se pśecej zasej wobnowjaś a reproducěrowaś. Ze žywjeńskim wjaselim – z perspektiwy prědneje wósoby – ga raźijo se nejspódobnjej.
